John 8
ស្ដ្រីផិតក្បត់ដែលគេចាប់បាន
1រីឯព្រះយេស៊ូក៏យាងទៅភ្នំដើមអូលីវ 2លុះព្រលឹមឡើងព្រះអង្គយាងចូលក្នុងព្រះវិហារម្ដងទៀតហើយបណ្ដាជនទាំងអស់ក៏មកឯព្រះអង្គដូច្នេះព្រះអង្គក៏អង្គុយចុះហើយបង្រៀនពួកគេ។ 3ពេលនោះពួកគ្រូវិន័យនិងពួកអ្នកខាងគណៈផារិស៊ីនាំស្ត្រីម្នាក់ដែលគេទាន់កំពុងផិតក្បត់មកពេលឲ្យនាងឈរនៅកណ្ដាលជំនុំហើយ 4ក៏ទូលទៅព្រះអង្គថា៖ «លោកគ្រូពួកគេចាប់បានស្ត្រីម្នាក់នេះនៅពេលនាងកំពុងផិតក្បត់ 5ហើយលោកម៉ូសេបានបង្គាប់យើងនៅក្នុងគម្ពីរវិន័យឲ្យគប់ស្ត្រីបែបនេះនឹងដុំថ្មដូច្នេះតើលោកថាយ៉ាងដូចម្ដេចដែរ?»។ 6ពួកគេនិយាយដូច្នេះដោយល្បងលព្រះអង្គដើម្បីឲ្យបានរឿងចោទប្រកាន់ព្រះអង្គប៉ុន្តែព្រះយេស៊ូបានអោនសរសេរនៅលើដីដោយម្រាមដៃ 7នៅពេលពួកគេចេះតែទទូចសួរព្រះអង្គនោះព្រះអង្គក៏ងើបឡើងមានបន្ទូលទៅពួកគេថា៖ «នៅក្នុងចំណោមអ្នករាល់គ្នាអ្នកណាគ្មានបាបសោះចូរឲ្យអ្នកនោះគប់នាងនឹងដុំថ្មមុនគេចុះ!» 8បន្ទាប់មកព្រះអង្គក៏អោនសរសេរនៅលើដីម្ដងទៀត។ 9ពេលពួកគេឮដូច្នេះក៏ថយចេញម្នាក់ម្ដងៗចាប់ពីមនុស្សចាស់ជាងគេរហូតនៅសល់តែព្រះយេស៊ូនិងស្ត្រីម្នាក់នោះ។ 10ព្រះយេស៊ូក៏ងើបឡើងហើយមានបន្ទូលទៅនាងថា៖ «នាងអើយតើពួកគេនៅឯណា? តើគ្មានអ្នកណាដាក់ទោសនាងទេឬ?» 11នាងទូលថា៖ «គ្មានទេលោកម្ចាស់!» ព្រះយេស៊ូក៏មានបន្ទូលទៅនាងថា៖ «ខ្ញុំក៏មិនដាក់ទោសនាងដែរចូរទៅចុះប៉ុន្ដែចាប់ពីពេលនេះតទៅចូរកុំប្រព្រឹត្តិបាបទៀត»។ព្រះយេស៊ូជាពន្លឺនៃលោកិយ
12ព្រះយេស៊ូមានបន្ទូលទៅបណ្ដាជនជាថ្មីទៀតថា៖ «ខ្ញុំជាពន្លឺនៃលោកិយអ្នកណាមកតាមខ្ញុំអ្នកនោះមិនដើរក្នុងសេចក្ដីងងឹតឡើយគឺមានពន្លឺនៃជីវិតវិញ»។ 13ពួកអ្នកខាងគណៈផារិស៊ីទូលទៅព្រះអង្គថា៖ «អ្នកកំពុងធ្វើបន្ទាល់អំពីខ្លួនឯងហើយសេចក្ដីបន្ទាល់របស់អ្នកមិនពិតទេ»។ 14ព្រះយេស៊ូមានបន្ទូលឆ្លើយទៅពួកគេថា៖ «ទោះបីខ្ញុំកំពុងធ្វើបន្ទាល់អំពីខ្លួនខ្ញុំក៏ដោយក៏សេចក្ដីបន្ទាល់របស់ខ្ញុំជាការពិតព្រោះខ្ញុំដឹងថាខ្ញុំមកពីណាហើយទៅណាផងប៉ុន្ដែអ្នករាល់គ្នាវិញមិនដឹងថាខ្ញុំមកពីណាឬទៅណាទេ 15អ្នករាល់គ្នាវិនិច្ឆ័យតាមបែបសាច់ឈាមឯខ្ញុំមិនវិនិច្ឆ័យអ្នកណាម្នាក់ឡើយ 16ផ្ទុយទៅវិញទោះបីខ្ញុំវិនិច្ឆ័យក៏ដោយក៏ការវិនិច្ឆ័យរបស់ខ្ញុំពិតដែរព្រោះខ្ញុំមិនបាននៅតែម្នាក់ឯងទេគឺមានខ្ញុំនិងព្រះវរបិតាដែលបានចាត់ខ្ញុំឲ្យមក។ 17សូម្បីតែនៅក្នុងគម្ពីរវិន័យរបស់អ្នករាល់គ្នាក៏មានសេចក្ដីចែងទុកមកដែរថាសេចក្ដីបន្ទាល់របស់មនុស្សពីរនាក់គឺជាសេចក្ដីពិត 18ដូច្នេះខ្ញុំជាអ្នកធ្វើបន្ទាល់អំពីខ្លួនខ្ញុំរីឯព្រះវរបិតាដែលបានចាត់ខ្ញុំឲ្យមកក៏ធ្វើបន្ទាល់អំពីខ្ញុំដែរ»។ 19ពួកគេក៏ទូលសួរព្រះអង្គថា៖ «តើព្រះវរបិតារបស់អ្នកនៅឯណា?» ព្រះយេស៊ូឆ្លើយថា៖ «អ្នករាល់គ្នាមិនស្គាល់ខ្ញុំទេហើយក៏មិនស្គាល់ព្រះវរបិតារបស់ខ្ញុំដែរបើអ្នករាល់គ្នាស្គាល់ខ្ញុំនោះអ្នករាល់គ្នាក៏បានស្គាល់ព្រះវរបិតារបស់ខ្ញុំដែរ»។ 20ព្រះយេស៊ូមានបន្ទូលពាក្យទាំងនេះនៅពេលកំពុងបង្រៀននៅក្បែរហិបតង្វាយនៅក្នុងព្រះវិហារប៉ុន្តែគ្មានអ្នកណាម្នាក់ចាប់ព្រះអង្គទេព្រោះមិនទាន់ដល់ពេលវេលារបស់ព្រះអង្គនៅឡើយ។ព្រះយេស៊ូប្រាប់អំពីការចាកចេញរបស់ព្រះអង្គ
21ព្រះអង្គមានបន្ទូលទៅពួកគេម្ដងទៀតថា៖ «ខ្ញុំត្រូវចាកចេញទៅហើយអ្នករាល់គ្នានឹងតាមរកខ្ញុំប៉ុន្តែអ្នករាល់គ្នានឹងស្លាប់នៅក្នុងបាបរបស់ខ្លួន។ កន្លែងដែលខ្ញុំទៅអ្នករាល់គ្នាមិនអាចទៅបានទេ»។ 22ដូច្នេះពួកជនជាតិយូដាក៏និយាយគ្នាថា៖ «តើគាត់នឹងសម្លាប់ខ្លួនឬបានជាគាត់និយាយដូច្នេះថាកន្លែងដែលខ្ញុំទៅអ្នករាល់គ្នាមិនអាចទៅបានទេ?» 23ព្រះអង្គមានបន្ទូលទៅពួកគេថា៖ «អ្នករាល់គ្នាមកពីស្ថានក្រោមឯខ្ញុំវិញខ្ញុំមកពីស្ថានលើអ្នករាល់គ្នាកើតពីលោកិយនេះឯខ្ញុំវិញខ្ញុំមិនកើតពីលោកិយនេះទេ 24ដូច្នេះហើយខ្ញុំប្រាប់អ្នករាល់គ្នាថាអ្នករាល់គ្នានឹងស្លាប់ក្នុងបាបរបស់ខ្លួនព្រោះបើអ្នករាល់គ្នាមិនជឿថាខ្ញុំជាព្រះអ្នករាល់គ្នានឹងស្លាប់ក្នុងបាបរបស់ខ្លួន»។ 25ពួកគេក៏ទូលសួរព្រះអង្គថា៖ «តើអ្នកជានរណា?» ព្រះយេស៊ូមានបន្ទូលទៅពួកគេថា៖ «ខ្ញុំប្រាប់អ្នករាល់គ្នាតាំងពីដំបូងហើយថាខ្ញុំជានរណា 26ខ្ញុំមានសេចក្ដីជាច្រើនត្រូវនិយាយហើយត្រូវដាក់ទោសអ្នករាល់គ្នាប៉ុន្តែព្រះជាម្ចាស់ដែលបានចាត់ខ្ញុំឲ្យមកព្រះអង្គពិតត្រង់ហើយខ្ញុំប្រាប់មនុស្សលោកអំពីសេចក្ដីដែលខ្ញុំបានឮពីព្រះអង្គ»។ 27ពួកគេមិនយល់ថាព្រះអង្គកំពុងមានបន្ទូលប្រាប់ពួកគេអំពីព្រះវរបិតាទេ។ 28ដូច្នេះព្រះយេស៊ូមានបន្ទូលទៅពួកគេថា៖ «ពេលអ្នករាល់គ្នាលើកកូនមនុស្សឡើងនោះទើបអ្នករាល់គ្នាដឹងថាជាខ្ញុំនេះហើយខ្ញុំមិនធ្វើអ្វីដោយខ្លួនខ្ញុំទេគឺខ្ញុំនិយាយសេចក្ដីទាំងនេះតាមតែព្រះវរបិតាបានបង្រៀនខ្ញុំ។ 29ព្រះអង្គដែលចាត់ខ្ញុំឲ្យមកព្រះអង្គគង់ជាមួយខ្ញុំព្រះអង្គមិនទុកឲ្យខ្ញុំនៅម្នាក់ឯងឡើយដ្បិតខ្ញុំតែងធ្វើអ្វីដែលគាប់ព្រះឫទ័យព្រះអង្គ»។អ្នកដែលជាសិស្សរបស់ព្រះយេស៊ូ
30ពេលព្រះអង្គកំពុងមានបន្ទូលអំពីសេចក្ដីទាំងនេះមនុស្សជាច្រើនបានជឿលើព្រះអង្គ។ 31ដូច្នេះព្រះយេស៊ូក៏មានបន្ទូលទៅពួកជនជាតិយូដាដែលជឿលើព្រះអង្គថា៖ «បើអ្នករាល់គ្នានៅជាប់ក្នុងពាក្យរបស់ខ្ញុំនោះអ្នករាល់គ្នាជាសិស្សរបស់ខ្ញុំពិតប្រាកដ 32ពេលនោះអ្នករាល់គ្នានឹងស្គាល់សេចក្ដីពិតហើយសេចក្ដីពិតនឹងដោះអ្នករាល់គ្នាឲ្យមានសេរីភាព»។ 33ពួកគេទូលឆ្លើយទៅព្រះអង្គថា៖ «យើងជាកូនចៅរបស់លោកអ័ប្រាហាំហើយយើងមិនដែលធ្វើជាបាវបម្រើរបស់អ្នកណាទេម្ដេចក៏អ្នកនិយាយថាអ្នករាល់គ្នានឹងមានសេរីភាពដូច្នេះ?» 34ព្រះយេស៊ូឆ្លើយទៅពួកគេថា៖ «ខ្ញុំប្រាប់អ្នករាល់គ្នាជាពិតប្រាកដថាអ្នកណាដែលប្រព្រឹត្តិបាបអ្នកនោះជាបាវបម្រើរបស់បាប 35ហើយបាវបម្រើមិននៅក្នុងផ្ទះជាប់ជានិច្ចទេឯកូនប្រុសនឹងនៅជាប់អស់កល្បជានិច្ច។ 36ដូច្នេះបើព្រះរាជបុត្រាដោះអ្នករាល់គ្នាឲ្យមានសេរីភាពអ្នករាល់គ្នាមុខជាមានសេរីភាពពិតប្រាកដ 37ខ្ញុំដឹងហើយថាអ្នករាល់គ្នាជាកូនចៅរបស់លោកអ័ប្រាហាំប៉ុន្តែអ្នករាល់គ្នារកសម្លាប់ខ្ញុំព្រោះពាក្យសំដីរបស់ខ្ញុំមិននៅក្នុងចិត្ដរបស់អ្នករាល់គ្នាទេ។ 38ខ្ញុំនិយាយសេចក្ដីណាដែលខ្ញុំបានឃើញនៅក្នុងព្រះវត្តមានព្រះវរបិតាដូច្នេះហើយអ្នករាល់គ្នាក៏ធ្វើតាមសេចក្ដីណាដែលអ្នករាល់គ្នាបានឮពីឪពុកអ្នករាល់គ្នាដែរ»។ 39ពួកគេទូលឆ្លើយទៅព្រះអង្គថា៖ «លោកអ័ប្រាហាំជាឪពុករបស់យើង» ព្រះយេស៊ូមានបន្ទូលទៅពួកគេថា៖ «បើអ្នករាល់គ្នាជាកូនចៅរបស់លោកអ័ប្រាហាំមែនអ្នករាល់គ្នាមុខជាធ្វើកិច្ចការរបស់លោកអ័ប្រាហាំ 40ប៉ុន្តែឥឡូវនេះអ្នករាល់គ្នារកសម្លាប់ខ្ញុំជាអ្នកបានប្រាប់អ្នករាល់គ្នាអំពីសេចក្ដីពិតដែលបានឮពីព្រះជាម្ចាស់មកលោកអ័ប្រាហាំមិនបានធ្វើដូច្នេះទេ 41ដូច្នេះអ្នករាល់គ្នាកំពុងធ្វើអ្វីដែលឪពុករបស់អ្នករាល់គ្នាបានធ្វើ» ពួកគេក៏ទូលទៅព្រះអង្គថា៖ «យើងមិនបានកើតមកពីការសាហាយស្មន់ទេយើងមានឪពុកតែមួយគឺព្រះជាម្ចាស់» 42ព្រះយេស៊ូមានបន្ទូលទៅពួកគេថា៖ «បើព្រះជាម្ចាស់ជាឪពុករបស់អ្នករាល់គ្នាមែនអ្នករាល់គ្នាមុខជាស្រលាញ់ខ្ញុំមិនខានដ្បិតខ្ញុំនៅទីនោះខ្ញុំចេញពីព្រះជាម្ចាស់មកខ្ញុំមិនបានមកដោយខ្លួនខ្ញុំទេគឺព្រះអង្គបានចាត់ខ្ញុំឲ្យមក។ 43ហេតុអ្វីបានជាអ្នករាល់គ្នាមិនយល់ពាក្យសំដីរបស់ខ្ញុំ? នេះមកពីអ្នករាល់គ្នាមិនអាចស្ដាប់ពាក្យរបស់ខ្ញុំបាន 44ហើយអ្នករាល់គ្នាមានឪពុកជាអារក្សសាតាំងអ្នករាល់គ្នាចូលចិត្តធ្វើតាមបំណងឪពុករបស់ខ្លួនដ្បិតវាជាអ្នកសម្លាប់មនុស្សតាំងពីដើមមកហើយមិនឈរនៅក្នុងសេចក្ដីពិតទេព្រោះវាគ្មានសេចក្ដីពិតក្នុងខ្លួនឡើយ។ ពេលវានិយាយកុហកវានិយាយចេញពីចិត្ដរបស់វាដ្បិតវាជាមេកុហកហើយជាឪពុកនៃសេចក្ដីកុហក 45ដូច្នេះដោយសារតែខ្ញុំនិយាយសេចក្ដីពិតអ្នករាល់គ្នាមិនជឿខ្ញុំ 46តើក្នុងចំណោមអ្នករាល់គ្នានរណាអាចបង្ហាញបានដែរឬទេថាខ្ញុំនេះមានបាប? បើខ្ញុំនិយាយសេចក្ដីពិតតើហេតុអ្វីបានជាអ្នករាល់គ្នាមិនជឿខ្ញុំ? 47អ្នកណាដែលកើតមកពីព្រះជាម្ចាស់អ្នកនោះស្ដាប់ព្រះបន្ទូលរបស់ព្រះជាម្ចាស់រីឯអ្នករាល់គ្នាមិនបានកើតមកពីព្រះជាម្ចាស់ទេបានជាអ្នករាល់គ្នាមិនស្ដាប់ដូច្នេះ»។ព្រះយេស៊ូ និងលោកអ័ប្រាហាំ
48ពួកជនជាតិយូដាទូលឆ្លើយទៅព្រះអង្គថា៖ «តើយើងនិយាយមិនត្រូវទេឬអីថាអ្នកជាជនជាតិសាម៉ារីហើយមានអារក្សចូល?» 49ព្រះយេស៊ូមានបន្ទូលតបថា៖ «ខ្ញុំគ្មានអារក្សចូលទេផ្ទុយទៅវិញខ្ញុំគោរពព្រះវរបិតារបស់ខ្ញុំប៉ុន្តែអ្នករាល់គ្នាបែរជាប្រមាថខ្ញុំទៅវិញ។ 50ខ្ញុំមិនស្វែងរកសិរីរុងរឿងសម្រាប់ខ្លួនខ្ញុំទេមានព្រះមួយអង្គកំពុងស្វែងរកហើយកំពុងជំនុំជម្រះ 51ដូច្នេះខ្ញុំប្រាប់អ្នករាល់គ្នាជាពិតប្រាកដថាបើអ្នកណាកាន់តាមពាក្យរបស់ខ្ញុំអ្នកនោះនឹងមិនជួបសេចក្ដីស្លាប់ឡើយ»។ 52ពួកជនជាតិយូដាក៏ទូលទៅព្រះអង្គថា៖ «ឥឡូវនេះយើងដឹងថាអ្នកមានអារក្សចូលមែនហើយ។ លោកអ័ប្រាហាំនិងពួកអ្នកនាំព្រះបន្ទូលបានស្លាប់ទៅហើយប៉ុន្ដែអ្នកបែរជានិយាយថាបើអ្នកណាកាន់តាមពាក្យសំដីរបស់អ្នកអ្នកនោះនឹងមិនស្គាល់សេចក្ដីស្លាប់ទៀតឡើយ។ 53តើអ្នកធំជាងលោកអ័ប្រាហាំជាដូនតារបស់យើងនិងពួកអ្នកនាំព្រះបន្ទូលដែលបានស្លាប់ទៅហើយនោះឬ? តើអ្នកតាំងខ្លួនជានរណា? 54ព្រះយេស៊ូឆ្លើយថា៖ «បើខ្ញុំតម្កើងខ្លួនខ្ញុំសិរីរុងរឿងរបស់ខ្ញុំឥតប្រយោជន៍ទេគឺព្រះវរបិតារបស់ខ្ញុំទេដែលលើកតម្កើងខ្ញុំព្រះអង្គនោះហើយដែលអ្នករាល់គ្នានិយាយថាជាព្រះរបស់យើង 55ប៉ុន្ដែអ្នករាល់គ្នាមិនស្គាល់ព្រះអង្គទេរីឯខ្ញុំខ្ញុំស្គាល់ព្រះអង្គបើខ្ញុំនិយាយថាខ្ញុំមិនស្គាល់ព្រះអង្គនោះខ្ញុំនឹងត្រលប់ជាអ្នកកុហកដូចអ្នករាល់គ្នាដែរប៉ុន្ដែខ្ញុំស្គាល់ព្រះអង្គពិតមែនហើយកាន់តាមព្រះបន្ទូលរបស់ព្រះអង្គទៀត។ 56រីឯលោកអ័ប្រាហាំដែលជាដូនតារបស់អ្នករាល់គ្នាបានត្រេកអរដោយឃើញគ្រារបស់ខ្ញុំឥឡូវនេះគាត់បានឃើញមែនហើយមានចិត្តរីករាយណាស់» 57ពេលនោះពួកជនជាតិយូដាទូលទៅព្រះអង្គថា៖ «អ្នកមានអាយុមិនដល់ហាសិបឆ្នាំផងតើអ្នកបានឃើញលោកអ័ប្រាហាំហើយឬ?» 58ព្រះយេស៊ូមានបន្ទូលទៅពួកគេថា៖ «ខ្ញុំប្រាប់អ្នករាល់គ្នាជាពិតប្រាកដថាមុនលោកអ័ប្រាហាំកើតមកនោះមានខ្ញុំរួចទៅហើយ»។ 59ដូច្នេះពួកគេក៏រើសដុំថ្មដើម្បីគប់ព្រះយេស៊ូប៉ុន្តែព្រះអង្គបានបំបាំងកាយយាងចេញពីព្រះវិហារ។
Copyright information for
KhmKCB